ಚಿಂದಿ ಆಯುವ ಹುಡುಗಿ (ಕವಿತೆ )

 ಚಿಂದಿ ಆಯುವ ಹುಡುಗಿ 

(ಕವಿತೆ )

ಮಂದಿ ಮಕ್ಕಳೊಳಗೆ ಚಂದಾಗಿ ಆಡುವ ವಯಸ್ಸು

ಎಸೆದ ಕಸದೊಳಗೆ ಮುಳುಗಿ ಹೋಗಿದ ಮನಸ್ಸು

ಮಿನುಗು ಕಂಗಳ  ತುಂಬ ಈಡೇರದ ಸಾವಿರ ಕನಸು 

ಎದೆಯೊಳಗೆ ಹುದುಗಿದೆ; ಸಾಗರದಷ್ಟು ಮುನಿಸು |

ಸಮವಸ್ತ್ರಗಳ  ಕಂಡಾಗ ಶಾಲೆಗೆ ಹೋಗುವ ಆಸೆ

ಕುಡುಕ ಅಪ್ಪನ ನೆನೆದಾಗ; ಮತ್ತೆ ನೋವು, ನಿರಾಸೆ

ನಿಟ್ಟಿಸಿರು ಬಿಟ್ಟು, ತಂಗಿ-ತಮ್ಮನ ಮುಖವೊರೆಸಿ

ನಡೆದಿಹಳು; ಮುಂಜಾವಲಿ, ಆಸೆಗಳಿಗೆ ಪಾಶ ತೊಡಸಿ |

ಮೊಗಕೆ ಅಲಂಕಾರವಿಲ್ಲ; ಒಡವೆಯಂತೂ ಕಂಡವಳಲ್ಲ

ವನಪು ವೈಯ್ಯಾರದಿ ಕೂದಲೆಂದೂ ಕಟ್ಟಿದವಳಲ್ಲ

ಹಸಿದ ಹೊಟ್ಟೆಗಾಗಿ ಕಸದಲಿ, ನಿತ್ಯವೂ ಹೆಕ್ಕುತ್ತಾಳೆ

ಕಳೆದ ಅವ್ವನ ನೆನಪಾಗಿ ಮತ್ತೆ ರೋಧಿಸುತ್ತಾಳೆ |

ಹರಿದ ಕುಪ್ಪುಸ-ಲಂಗವ ತೊಟ್ಟು ಮುಚ್ಚಿಹಳು ಅಂಗ

ಕಣ್ಣಲ್ಲೇ ಬೆತ್ತಲೆ ಮಾಡುವ ನೋಟಕ್ಕಾದಿತೇ ಭಂಗ?

ಎಂದು  ತನಗೊದಗಿದ ಗತಿಯ ಹಳಿದು ಅರೆಗಳಿಗೆ

ಅಂದು ಮೂಕಳಾಗಿ ಹೊತ್ತು ನಡೆದಿಹಳು ಜೋಳಿಗೆ |

ಬದ್ಧ ಬದುಕಿಗೆ ಸಿಕ್ಕ ಎಳೆಗಳ ದಾರಹೊಸೆದು 

ಬಿದ್ದ ಕಸದಲ್ಲಿಯೇ ತನ್ನ ಕನಸುಗಳ ಎಸೆದು 

ಚಿಂದಿ ಆಯುತಿಹಳು; ಬಿಡದೇ ಬಾಗಿ ಬಾಗಿ

ಅವಳೇ ಕಪ್ಪು ಕಂಗಳ ಚಿಂದಿ ಆಯುವ ಹುಡುಗಿ |

                                         🖊ಡಾ. ಶಿವಾನಂದ ಬ. ಟವಳಿ